قدرى .. ونعم بالله

عصام
وقبل ما أبدا .. حسبى الله ونعم الوكيل فيه ..
عصام ده حبيب قلبى .. المفروض تلميذى ..نقطة سودة فى حياتى .. كل اللى يعرفونى ويعرفوه كرهونى بسببه .. هو الوحيد اللى بيحسسنى إنى فاشل .. ماتعملش منى غير حاجة واحدة بس .. كلنا اتعلمنا بطريقة (تراى آند إرور) .. عصام ساب كل اللى شافه منى .. وخد الـ (إرور) .. إيه اللى عاجبه فيه .. مش عارف
يعملشى مرة حاجة صح .. أبدا .. يمكنشى مرة يفهم .. لا ممكن .. يفرحشى قلبى مرة .. مستحيل
واخد الـ إرور وطالع بيه وابور .. إيه .. مافيش حاجة تقف فى وشة .. لو حط ايده فى كود .. اى كود . إنشالله يكون
"Hello world"
الكود بعدها يغنى يظلموه ويطلع
"Go to Hell"
عصام .. أسطورة فى التخريب .. المدمرة عصام .. يأتى على الأخضر واليابس .. لا يبقى ولا يذر .. مافيش بروجيكت اشتغل عصام ورايا فيه إلا يا العميل طار يا غير رأيه ويقرر ما يستخدمش الكمبيوتر أصلا يا مات (بجد مش تهريج) وبركاته فى المواضيع دى كتير
مثلا راح لعميل مرة .. كابل الكهربا بتاع المنطقة كلها ضرب
راح لعميل غيره .. العميل غير رايه بعد ما كان مقتنع وهو اللى متصل بينا
راح لعميل تالت .. اتخانق معاه
راح لعميل رابع .. العميل
مااااااااااااااات
مات والله
الخلاصة .. عصام سرة باتع
عاشرته 6 سنين ماشوفتش فيهم يوم هنا
ولا مرة جاب لى خبر كويس
مصيبتى الكبيرة .. إن انا للى اختارت انه يخش قسم البرمجة .. انا اللى جنيت على نفسى وعليه وعلى كل البروجرامز اللى عصام هايتعامل معاهم
عصام جاى النهارده يقولى .. انا عايز اعمل سايت
خلفيته عن الويب غنها الحتة اللى الناس بتخش تعمل فيها شات !!!!!!!!!!
وعايزنى اشرح له مش من اول ما يحجز الدومين .. لا .. من أول يعنى ايه دومين
لحااااااااااااااااااااااااااااااااد ما السيت يجيب له فلوس
.
.
.
.
.
.
.
.
Opjection

مممممممم .. زهقان

ممممممممممممممممم .. مش عارف .. زهقان .. قرفان .. متدايق
بس مافيش واحدة قرفتنى وسدت نفسى ولا حاجة ... ومن يوم ما ابتديت فى شغل السايت وعمرى ما كنت مدلع نفسى
بس ماليش مزاج حتى أكتب .. السايت خلص وانطلق وابتديت رحلة الدعاية الشااااااااااااااااااااااااااااااااقة جدا
أحمد نبيل اللى الله لا يكسبه ولا يربحه بتاع اقتراح تغيير الـ (إم إكس) بتاع السيرفر .. أكيد فاكرينه دا انا قعدت ليلة بحالها أدعيييييييييييله من قلبىىىىى - احمد قالى أن اسلوب الدعاية اللى انا كنت ناوى اعمله ممكن يعمل حاجة اسمها
Invalid Impressions
ودى حاجة مش كويسة عشان حساب جوجل مايتلغيش
الله يخرب بيت جوجل وسنينه الصودة .. خلانى أمشى أكلم نفسى
اضطريت أغير خطط الدعاية وده هايضطرنى أقع تحت رحمة لليرش إنجين .. وايييييييييه .. حلِّنى على ما السايت ياخد رانك ولا يتعرف .. ما علينا
إحساس القرف متصاعد .. ماروحتش الشغل النهارده .. قمت خاصم لنفسى يومين أنا ووائل وخالد عشان بيستعبطوا وماجوش
طب انا بادلع .. هما بيدلعوا ؟؟ خلاص يبقى كلنا نستاهل الخصم
وكبرت فى دماغى قمت متصل بالشئون الإدارية مبلغهم بالخصم عشان اتأكد إنه هايحصل

خلاص مش هاكتب تانى لاحسن أخصم كمان للى هايقرى واللى هايكتب كومنت هارفده .. وكفاية كده شر

الكل خانوك يا ريتشارد

خونة .. أصحابى كلهم خونة .. الفيزا اتوقفت قبل ميعاد التسجيل بيوم واحد
عمال ألف وأدور زى النحلة على حد معاه فيزا يدفعلى ثمن الهوست وأديهمله .. بس كلهم خونة.. ما نصدق واحد يقع والكل يمسكه مسخرة وتريقة .. ماشى ماشى .. كله سلف ودين حتى المشى ع الرجلين
بس أنا ولا يهمنى .. لو فاكرين لما كتبت "طلعت لى مشكلة صغيرة" كانت اول مشكلة طلعت لى إنى أكتشفت إنى طور الله فى برسيمة بالنسبة للبى اتش بى .. بس خلاص .. أنا عزمت وقررت وعقدت النية على تعليم البى اتش بى .. اعمل ايه .. مافيش حل تانى ... فضلت ورا كود السايت لحد ما عرفت أشق طريقى بين الادغال .. ولغيت كل احتياجات السايت لإرسال الإيميلات من جوه الكود .. وخليته مفتوح ع البحرى
أى حد فى الشارع عايز يدخل يعمل ريجيستر دولقتى فى السايت ممكن وبقى على عينك يا تاجر واللى ما يشترى يتفرج .. ولا الحوجة للهوست المدفوع ولا الخونة كلهم إللى أعرفهم ... ياااااااااااااااااااااااارب يتزنقوا فى هوست مدفوع يارب وتكون فيزتى شغالى ويطلبوا منى وانا اتأمر عليهم وأقولهم بعينك يا صاحبى يا فقير يا أبو من غير فيزا انت وهو
ده غير كل ده مافيش غير حبيبة قلبى متغيرة شوية هى الوحيدة اللى بتقرأ

اللى باكتبه .. يارب يخليكى ليا يا متغيرة يااااااااااااااااااااااااااارب .. وكل الى قلت له على البلوج ومادخل قراه وكتب تعليق يا رب ماحد يعبرهم ..

اللهم ماوقف سايتتاتهم وشغل السايت بتاعى - أنا ومتغيرة شوية

اللهم ما قلل عدد زوارهم وزود عدد زوارى - أنا ومتغيرة شوية

اللهم ما نزل رانكهم فى جوجل وياهوو وعلى الرانك بتاعى - أنا ومتغيرة شوية

اللهم اكسبير الهوست بلاين بتاعتهم ورينيو الهوست بتاعى - أنا ومتغيرة شوية

آآآآآآآآآآآآآآآمين

أصل متغيرة شوية بيلت-إن فى دعوتى على اصحابى عشان ماحدش رد عليا غيرها

إيييييه .. ما علينا

خلاص .. مش فاضل غير شوية رتوش فى السايت .. الرتوش دى يعنى قد تلات أربع تيام بهدلة فى التخبيط (اللى هى اصلها تظبيط .. بس نظرا لمعرفتى الخارقة والجبارة بلغة بى اتش بى اصبح من الضرورة تغييرها الى معنى أكثر دقة) التخبيط مع البى اتش بى لحد ما اوصل بيه للى انا عايزه .. وبعدين .. فليتضخم الوحش .. وينطلق السايت عاليا مرفرفا فى اجواء الشبكة العنكبوتية ويجتذب ملايين من المشتركين حول العالم ليصبح السايت نمبر وان فى سماء عالم .. عالم الـ (ايه)؟؟
صدمه .. مش كده؟
انا لسه ماحطتش الكومبوننت ... نروح بقى نحط شوية كومبوننت وخلاص فى السايت عشان ابتدى حملة الحرب مع مواقع الإعلانات عشان تشهر لى السايت ...

هابقى اكتب مرة عن الخطوات الصحيحة من غير وجع القلب اللى انا فيه ده عشان اللى عايز يعمل سايت يبقى يعمله بسهولة بدل ما يضطر يتعلم لى اتش بى بى
هى ببساطة:
1- حجز دومين
2- حجز هوست
3- ربط الاتنين ببعض
4- اختيار سكريبت جاهز للسايت
5- عمل سيت آب للسكريبت على السايت
6- كونفيجريشن وبيرسوناليزيشن (إيه الثقافة دى .. حومار ياخواتى؟؟) للسكريبت بعد تحميله
7- ريجيستر (وتستمر الثقافة) مع جوجل للإعلانات
8- وضع إعلانات جوجل فى مكانها فى السايت(حرب الـ بى اتش بى إللى اشهر من حرب الفراولة) عشان العمود اليمين مايختفيش
9- ريجيستر مع مواقع الدعاية المجانية لعمل حملة دعاية للسايت(حرب الفراولة التانية) عشان الناس تدخل عليه
10- وضع السايت فى الـ (فرى سيرش إنجين) (فليحيا الفرانكو آراب) عشان يظهر فى السيرش مع جوجل وياهوو
11- وضع شوية أكواد مراقبة جوه السايت عشان نعرف الترافيك جاية منين ونشوف توجيه السايت الإعلانى
12- ضبط النفس لعدم الإصابة بضغط الدم والسكر وخلافه عند اكتشاف إلغاء حساب جوجل وذلك بالاشتراك فى شركة أو اتنين احتياطى من شركات الإعلانات إللى اصغر من جوجل - بالبلدى: الاحتياطات لعدم إغلاق الحساب

ياللا جود باى

ينفع كده ؟؟

مش غاوى انا معاملات بنوك ووجع قلب .. ويوم ما فكرت أطلع الفيزاكنت عايز اشترى هوست ع النت وماينفعش من غير الفيزا .. قلت خلاص طالما مافيش حل تانى .. وخدت القرار باستخراج الكارت المصون
فتحت حساب فى البنك وعملت فيزا وعشان مش عايز وجع دماغ حطيت ضمان الفيزا قيمة قليلة تحسبا .. وكده كده انا مش هاسددها ويبقى ياخدوا الضمان مكان المصروفات وخلاص .. لسه هاروح أسدد فى البنك ... بلا غلب..

وراحت الأيام وجت .. واحتجت الفيزا تانى عشان احجز الهوست بتاع مشكلة امبارح اللى كتبتها بعنوان طلعت لى مشكلة صغيرة وكان المفروض اطلب فتح التعامل على النت بالفيزا عشان مقفولة لدواعى الأمان ...
اتصلت بالبنك
رد عليا الموظف المؤدب جدا أبو صوت هادىىىىىىىىى
طلبت فتح التعامل على النت
قالى اسم سيادتك يا فندم .. قلت احمد السيد
تاريخ الميلاد قولتهوله
تاريخ الكارت قولتهله برضه
سألنى على الرقم .. مليتهوله
سألنى حد الائتمان.. مليتهوله
قالى سيادتك الفيزا دى اتغيرت من كارت عادى لسمارت كارت .. قلت له أيوة تمام
قالى سيادتك مش بتدفع فى مواعديك .. قلت له أيوة تمام .. انا عندى الضمان يكفى وانا معتمد على كده
قالى سيادتك احنا آسفين حضرتك تجاوزت المدة المسموحة
الفيزا اتوقفت ..
بمنتهى البساطة والهدوووووووووووووووء

ولا كأنه قرى اللى كتبته امبارح

اتوقفت يعنى لازم اعمل فيزا غيرها .. وياريتها اتوقفت انتهاء صلاحية .. دى اتوقفت بلاك ليست .. يعنى لازم افتح حساب غيره .. ينفع كده ؟؟

طلعت لى مشكلة صغيرة

سهران .. طول الليل سهران ..مش عارف أنام .. النوم طاير من عينى .. ولو نمت باحلم بيها .. كل ما اغمض عينى أشوف طيفها فى خيالى .. جميلة قوى .. صورتها ما بتروحش من خيالى .. طول عمرى باحلم بيها كده .. مش قادر أوصف انا باحلم بيها قد إيه .. فعلا فيه مشاعر ما تتوصفش .. شكلها ما بيروحش من بالى لحظة
جميلة .. رقيقة .. شيك .. بيضا .. فيها بانر من فوق .. وإعلانات جوجل فى النص .. وشريط القوائم الرئيسية على الشمال ... ياااااااااااه .. امتى بقى اشوف الهوم بيدج بتاعة السايت كاملة

آه الهوم بيدج ... امال انتو فاكرين ايه ؟؟ هو فيه واحدة تقدر تعمل فيا اللى السايت ده عمله ولسه بيعمله وهايعمله؟؟ ده السايت بيستمتع بتعذيبى .. سايت حى .. الشيخ سايت حى وبيلعب .. وسيكوباتى .. والله سايت سيكوباتى .. بيجد متعة غريبة تعذيبى

بعد حرب طوييييييييييييييلة مع مواقع الهوست والدومين ... أخدت الدومين والهوست وربطهم ويادوب هاقعد أفكر هاعمل فى السايت إيه .. إذ بى أفوجئ "الله يمسيك بالخير يا شريف يا صالح" ان الهوست بيدينى اكواد جاهزة لعمل السايت .. اتمطعت وشمرت كمامى وقمت ملغوص فى كل الأكواد الموجودة .. وبعد فحص وتمحيص اخترت واحد فيه كل اللى باحلم بيه .. بس طلعى عيب واحد صغير.. الكود مكتوب بلغة بى اتش بى وللأسف أخوكم بالنسبة للـبى اتش بى التور بتاع الربونا فى البرسيم بتاع الهو .. بس قلت ياض غامر وجرب وده عيب بسيط ممكن نتخطاه بشوية مجهود
اخدت الكود وشغلته .. ياااااه .. زى الفل .. الدنيا ضحكتلى ..
طلع فيه عيب صغير كمان .. الهوست مجانى .. مش بيبعت ايميلات .. والكود كله معتمد على ارسال ايميلات تأكيد عضوية ولوجين وبلاوى زرقا .. الهوست قافل عليا الـ SMTP عشان انا فقير وواخد هوست مجانى .. قلت والله ابدا .. انا ولا يهمنى .. انا فنجرى هانفك الكيس ونشترى هوست ونكرر مآساة السنة اللى فاتت .. شمرت كمامى لتانى مرة وقمت مطلع كارت الفيزا وقلت هاشترى هوست ولا حد يذلنى .. بس بدل ما نشترى هاعمل ترقية للخطة المجانية اللى معايا لخطة مدفوعة بدل ما أعيد الشغل تانى .. ما هو حرام برضه.
طلع لى عيب صغير كمان .. الخطة المجانية لا يمكن ترقيتها .. لازم اشترى واحدة جديدة من الاول ..
شمرت كمامى لتالت مرة وقعدت الف على سايتات الهوست انقى أحلى واحدة . .ما انا هادفع بقى وماحدش هايذلنى .. لاقيت الشركة اللى عجبتنى قمت هووووب ماسك الكارت وهاتك يا ملى ابليكيشن وإديها سبميت أوردر ..
طلع لى عيب صغير كمان .. السايت بيقولى الفيزا مرفوضة ... قلت والله ما شركة زى دى تهزنى .. دى تلاقيها واحدة من الشركات اللى مش بيضوا يتعاملوا مع فيز الشرق الأوسط .. يسقط العملاء والخونة ... هاشوف شركة غيرها ..
شمرت كمامى لرابع مرة ولفيت شوية كمان لحد ما لاقيت شركة تقبل الفيزا .. هوب ياللا املى ابليكيشن ودوس سابميت أوردر .. رد عليا بكل شموخ واقتدار قالى برضه الفيزا مرفوضة .. قلت الشركات متفقين عليا .. كلهم واقفين ضدى .. أعداء النجاح .. الخونة .. قلت ياض كده مابدهاش .. اتصل بمركز البطاقات شوف ايه الحكاية دى لاتكون الفيزا اتعلقت .. اتصلت بيهم رد عليا الشاب الظريف جدا والمؤدب جدا اللى بيقولك كل حاجة تحرق دمك بس .. وقالى ان الفيزا مقفول عليها التعامل على النت لدواعى الأمان .. قلت له بسيطة خالص نفتح التعامل على النت على مسئوليتى .. قالى سيادتك تأمر يا فندم .. قلت له افتح يا خويا . قالى لا يا فندم سادتك لازم تشرفنا بطلب عليه التوقيع البنكى .. اتفضل سيادتك لأقرب فرع للبنك وقدم الطلب ..
قلت عادى جدا .. جبت جواب البنك والعنواوين وشوفت عنوان اقرب فرع .. لاقيته قريب قوى فى الهرم . .قلت اتصل عشان آخد العنوان بالظبط وننزل نغير ام الفيزا (سورى مامت الفيزا) ونخليها نت .. اتصلت بالبنك .. رد عليا موظف برضه مؤدب قوى .. حكيت له الحكاية بالتفصيل وقلت له عايز أعرف ينفع اعمل الطلب بالتليفون ولا لأ؟ وبصراحة الراجل سمعنى فى منتهى الاهتمام .. آه الحق يتقال .. بس فى الآخر قالى سيادتك انا من الامن بتاع البنك .والنهارده عيد العمال والبنك قافل.. شرفنا سيادتك بكرة
عاااااااااااااادى جدا .. ولا يهمنى ...
قلت ياض مش مشكلة .. بكرة بكرة ما علينا .. وبعدين قلت إيه ده .. انا لسه هاستنى لبكرة؟؟ انا هاغير الـ MX بتاع الهوست لاسم سيرفر الـ Live بتاع ميكروسوفت زى ما احمد نبيل -الله لا يكسبه ولا يربحه- ما قالى وكده السايت هايبعت ايميلات.. غيرت الـ MX ..
الحمد لله .. السايت وقف خالص
باظت الليلة " لما أغير أى إعدادات .. التعديل بياخد من ساعة إلى 24 ساعة على ما يشتغل" .. قلت بدل ما أضيع الوقت أونطة .. انا هاقعد أدعى على احمد نبيل طول الليل . أأقله ابقى شفيت غليلى .. ما انا كنت شغال .. هو اللى شار عليا بالشورة السودة دى .. ما علينا .. دعيت عليه طول الليل بما يرضى الله لحد ما السايت اشتغل تانى .. قلت ارجع بقى اشتغل واخلص مش ضرورى تحل مشكلة الايميل دلوقتى
شمرت كمامى لرابع مرة .. وفتحت الكونترول بانل بتاع السايت وقعدت اظبط فيه .. وفتحت اكاونت جوجل واخد الكود المفروض يتضاف عندى عشان الإعلان يظهر فى السايت ..
طلعت لى مشكلة صغيرة كمان .. مش عارف فين المكان اللى احط فيه الكود عشان يطلع لى الإعلان مطرح ما انا عايز .. ما انا حمار بى اتش بى بقى
قلت مش مشكلة .. النت أهيه والحل أكيد موجود .. عملت شوية سيرش لحد ما جبت الحل والحمد لله ..
بس طلعت لى مشكلة صغيرة كمان .. طبقت الحل كما أنزل .. والإعلان ما ظهرش ..
قلت مش مشكلة .. دورت تانى وقعدت أدور على الحل .. لحد ما لاقيت حل بطريقة تانية .. قلت الحمد لله ..
طبقته كما أنزل .. بس الإعلان برضه ماظهرش .. فيه مشكلة شخصية بين الإعلان وبينى .. مش عارف ليه مزرجن كده معايا ...
دورت على حل تالت .. وطبقته كما أنزل برضه ... بس الإعلان حل خلافه الشخصى معايا وتكرم بالظهور
أزغرد .. إيه ده .. سايت زى الفل وإعلانات ومنظر وشياكة ومابيبعتش إيميلات .. يادى الغم .. افتكرت حكاية الميل تانى نكدت عليا .. قلت خلاص بقى اللى فات مات .. كلها ساعات النهار ونغير الفيزا ونشترى هوست بفلوسنا ولا حد يتأمر علينا
لما نبص بقى بصة كده على المجهود الخرافى اللى عملته أشوف النتيجة .. بافتح السايت وإذ بى افوجئ (لتانى مرة) بكارثة .. السايت فيه عمود يمين وعمود شمال .. الشمال موجود فى مكانة بكامل هيئته وهيبته .. واليمين اختفى .. العمود راح فين .. مش عارف .. مين سرق العمود؟؟
يا عم عمود .. الله يهديك الله يرضيك ... إظهر .. ايه اللى حصل .. قلبت الكونترول بانل بتاع السايت يمكن اكون مارست هوايتى واستحمرت كالعادة ولاغيت العمود .. نو نو نو .. الكونترول بانل أعلنت بمنتهى الحسم إنها غير مسئولة كليا وجزئيا عن اختفاء العمود الأيمن وان اختفاؤه مسئولية الحومار اللى قاعد .. سيادة الحومار وهو بيجرب يشغل الإعلانات .. مسح العمود اليمين .
وإيه يعنى .. ولا يهمنى .. زى ما مسحت الست والدة العمود الأيمن هانرجعها تانى ..
شمرت كمامى لخامس مرة وهاتك ياحذف وتراجع عن كل الشغل اللى اتعمل فى محاولة مستمية لاسترجاع العمود الأيمن ..
أخيرا .. مسحت كل اكواد الإعلانات اللى قعدت احط فيها أربع ساعات .. وفتحت الهوم بيدج .. بس العمود الأيمن برضه أعلن بكبرياء وشموخ أنه يرفض الظهور
مافيش قدامى غير حل واحد .. أعمل سيت آب للسايت فروم سكراتش .. وياعينى على فروم سكراتش دى .. هو انا ايه .. حمار بيشتغل ما بيتعبش ..
آه حمار بيشتغل .. عملت سيت آب فروم سكراتش .. ولا يهمنى
ياااااااااااااااااااااااااااااااااااااااااااااااااااااااااااااااااااااااااااااااااااااااااااااه
أطول ليلة فى عمرى ..
السايت اشتغل
هاشترى هوست بفلوسى وماحدش هايتأمر عليا
الميلات هاتتبعت
الإعلانات بتظهر
السايت زى ما كنت باحلم بيه
اعتقد من حقى على أى حد يقرا الصفحة دى إنه يشوف السايت اللى عمل فيا كل ده
www.jana.uni.cc
وقريبا إن شاء الله .. حربى مع مواقع الدعاية والإعلان فى سبيل إشهار السايت
وإلى اللقاء إن كان فى العمر بقية

وبقي سليمان ينتظرُ

ساعات تقوم عليا جنونة الشعر .. وافتكر نفسى شاعر .. اقعد أألف شعر .. يطلع ايييييييييييييييه.. حاجة عظيمة أعوذ بالله ماتعرفش عدلة الورقة من قلبتها .. استسلم واتهد.. واكتفى بقراية الشعر الحقيقى بتاع الناس اللى بتفهم .. فكرت أدور على أجمل بيت شعر اتقال فقريت البيتين دول من قصدتين عجبونى
(1) لا تعجبن لغدر الزمان لطالما رقصت على جثث الأسود كلابا
(2) لو كنت اعلم ان الحلم سيجمعنا لأغمضت طوال الدهر اجفاني
قلت يا سلام .. آدى الشعر اللى مكتوب على الورقة بالمعدول صحيح .. وفى وسط ما أنا بادور قريت الحكمة دى ..
جاء سليمان عليه السلام بكل إناث الطيور وقال لها: آمر كلَّ واحدةٍ منكنَّ أنْ تذهبَ فتبحثَ عن أجمل مخلوقٍ فتعودَ لتخبرَني ما يكون.. فغادرتْ كلُّ الإناثِ سراعاً إلاّ أنثى الغراب .. فقالَ لها سليمانُ: لمَ لم تذهبي؟قالتْ لهُ: وهل في الدنيا ما هوَ أجملُ من فراخي!؟
وانتظر سليمان الأخريات
ولكنَّها بقيتْ تحوم حائراتٍ إلى يومنا
وبقي سليمان ينتظرُ!

ساعتها بس عرفت أن أجمل بيت شعر .. لسه ماقلتوش

إيه حكايتك يا جوجل

مش فاهم انا ايه القصة دى .. كل ما افتح حاجة فى النت تطلع جوجل .. الميل .. السيرش .. الإعلانات .. حتى البلوج .. فيه ايه
حكايتى مع جوجل ترجع لسنتين والله .. وصابر وساكت عليه
ابتدى الموضوع بميل معفن -ولامؤاخذة- واحد ماعرفهوش بعتهولى .. بيقول ايه بقى .. إزاى تكسب فلوس من على النت .. ماخبيش عليكو .. انا ماصدقتش .. بس قلت مافيش مانع من التجربة .. فضلت مع الموضوع .. حدفنى على سايت حط لى بار على الشاشة قعد يطلع لى فى إعلانات لمواقع تفرجنى على إعلانات وتدفعلى - نصب طبعا ماشوفتش منهم تعريفة - لمواقع تملى ميلى إعلانات على حس إن المغفل اللى بيقراها هايدفعوله
الموضوع كله نصب فى نصب فى نصب
بس بالأمانة .. مش نصب قوى كده ..
الموضوع طلع تجارة كبيرة قوى قوى قوى .. والحاج جوجل طبعا شيخ المنصر .. قصدى عمهم (لم لسانك ده البلوج بتاعهم) الموضوع مش شوية إعلانات وخلاص .. الخلاصة .بعد ما طلع عين أهلى عرفت ان برنامج جوجل الإعلانى
Google Adsense
هو زعيم الحركة الوطنية للإعلانات على النت .. قلت مافيش مشكلة نشترك معاه .. ما انا بقيت مغفل متمرس ومدمن إعلانات .. جت عليه هو .. نضيع معاه شوية وقت كمان
جوجل عشان يقبلنى فى البرنامج بتاعه طلع لازم يكون عندى ويب سايت والويب سات عايز اشتراك فى شركات الهوست وشركات الهوست عايزة اشتراك فى شركات الدومين ولما بقى عندى هوست ودومين جريت ورا محتويات السايت .. هاحط فى امه ايه .. .. هاسيبه فاضى .. جريت ورا محتويات السايتات .. من محتويات مجانية لأكواد جاهزة لمواقع بالكامل جاهزة .. وبعد ما خلصنا من وجع القلب ده كله .. هانجيب منين ناس بمعناة الكلام يتلوه .. قصدى هانجيب منين ناس تخش السايت تتفرج عليه .. جرينا ورا شركات الدعاية والفرع اتلوى ورجعنا لاول سايتات نصب بتعمل دعاية عشان تعمل لنا دعاية وفضلت ألف حوالين نفسى لحد ما وصلت لأساس الموضوع .. جوجل .. وحسبى الله ونعم الوكيل .. جوجل وياهو هما أكبر شركتين على الأرض والمجرة وعنقود المجرات والكون كله بتعمل دعاية ..
!!!!!!!!!!!!!!!!!!!
وطبعا مش ببلاش ... يعنى هادفع لهم فلوس يعملوا لى دعاية على السايت اللى انا واخد منهم إعلانات أحطها فيه عشان آخد منها فلوس ...
!!!!!!!!!!!!!!!!!!
إيه رأيكم ؟؟
مغفل أنا .. مش كده؟
إيه .. مغفل كبير .. ماشى ماشى .. ما هو بعد اللى شوفته اى كلمة مابقتش تأثر فيا .. جتتى نحست يعنى
ما علينا ..
استلسمت للأمر الواقع ولأنه مافيش حل تانى غير إنى يكون عندى سايت عشان يكون فيه بارقة أمل إنى أجيب منه فلوس .. سلمت أمرى لله وقعدت أعمل السايت
ولما زهقت من كتر شغلى فيه .. فتحت جوجل (برضه) ادور على أغنية .. واتعرفت على الأبلة متغيرة بالطريقة اللى قلت عليها

بصراحة زهقت
قلت سيبنا من شغل السايت شوية .. تعال ياض اقعد العب بالبلوج ده ...
طلع البلوج بتاع جوجل
ومن جوه البلوج ممكن يبقى عندك حساب إعلانات جوجل
برضه جوجل
بانام أحلم بيه ..

انا قايم رايح الشغل وحسبى الله ونعم الوكيل ...
لو لسه فيا عقل هابقى احكى شوية مغامرات من اللى عملتها ع النت بسبب الموضوع ده

من خاف .. سلم

والله ولا كان على بالى
الموضوع كله ابتدى لما كنت بادور على أغنية لطيفة شوفته بعينى ماحدش قالى مع انى والله العظيم مش باحبها
زى اى بنى آدم فى الدنيا بيدورعلى حاجة فتحت جوجل وكتبتله شوفت بعينى فالراجل كتر خيره جاب لى شوية نتائج
مش أدور بقى على اللى انا عايزة وأخلص .. لأ .. اتفلسف .. قعدت قريت النتايج كلها ... قام الفضول ودانى على مدونة الحاجة متغيرة شوية مقالة اسمها شوفت بعينى ... فتحت الصفحة .. الأبلة حاطة أغنية نيللى .. وسعادة الباشا سيادتى طفل .. شبطت فى الأغنية ونسيت انا داخل ليه
قعدت فاتح الصفحة قول ساعة مثلا عمال أعيد وأزيد فيها .. عيل بقى .. وبرضه مش اسمع الأغنية وأسكت .. ايدى اللى زى الدودة قعدت تلعب فى اللينكات .. لاقيت لينك البروفيل .. فتحت البروفيل .. دونا عن كل اللينكات اللى فيه ..ماشوفتش غير اسم الماسينجر .. ضفت الأبلة متغيرة .. كلمتها وقلت لها عجبانى الأغنية جدا .. لحد دلوقتى ده كله عادى
من شبطتى فى الأغنية قلتلها ابعتيهالى هى وأغنية سوسة بتاعة عفاف راضى (أحنا متفقين إن انا راجل عيل فماحدش يتريق) .. قوم ايه .. متغيرة قالتلى سوسة هاتلاقيها عند ابراهيم وابراهيم .. يعنى انا جاى أهوه عشان اسمع أغنية سوسة بتاعة العيال ..افتح صفحة ابراهيم المنسجم مع نفسه ألاقيه ياخويا آل إيه .. بيقول مبارك ع الجزمة .. قلت تمااااااااااااام .. كده احلوت قوى ... متغيرة وصلت لأصل تسمية الضربة الجوية الاولى وابراهيم واخد ميكروباصات المطار السرى بتاع متغيرة ونازل أول شارع ورا الشمس
مالى انا بالناس دى يابويا ..
فكرك الموضوع خلص .. والله ابدا .. مش اتهد واسكت بقى .. لا ... قمت حاطط له بوست على المقالة بتاعته كأنى واحد حبيبه ويعرفنى من ميت سنة عشان لما ياخدوه .. ياخدوه هو واللى معاه كلهم .. وطبعا حبايبه هما اللى رادين عليه
هاهاى .. وانا بقيت منهم
إيه ... خلاص كده .. والله ابدا ... دا انا قمت عامل مدونة انا كمان وكاتب فيها الحكاية كأنى فرحان باللى عملته
اسكت بقى ؟؟ .. لا .. مابحرمش كتبت فى التعليق بتاعى عند ابراهيم اسم السايت بتاعى اللى ممكن من معلومات الدومين اى حد على وجه الخليقة يعرف عنوان بيتنا حتى ....

يا نهار أسود .. ده بجد فيه عنوان بيتنا
طب استأذنكم بقى ألحق أعزل وأغير رقم التليفون والموبايل وأتبرى من أهلى ومعارفى واصحابى وجيرانى وزمايلى عشان ماجبش رجل حد فيهم معايا


تفتكروا لو قلت لهم إن المصيبة اللى ممكن تحصل بسبب أغنية سوسة .. حد ممكن يصدق